12 мая- Дзень Дзяржаўнага герба і сцяга Рэспублікі Беларусь
Дзень Дзяржаўнага герба і сцяга Рэспублікі Беларусь
Традыцыйна гэты дзень адзначаецца ў другую нядзелю мая, у гэтым годзе — 12 мая. Атрыбутамі любой суверэннай дзяржавы з’яўляюцца дзяржаўны сцяг, герб і гімн. Гэтыя сімвалы адлюстроўваюць гістарычныя і духоўныя рысы нацыі, асаблівасці культуры і светабачання беларускага народа. Канчатковы выгляд сучаснай сімволікі Беларусі сфарміраваўся ў 1995 годзе. Тады на рэспубліканскім рэферэндуме грамадзяне рэспублікі выразілі нязгоду з бела-чырвона-белым сцягам і гербам “Пагоня”, якія былі прыняты ў 1991 г., і падтрымалі існуючую сімволіку. Дзяржаўны сцяг нашай краіны ўяўляе сабой прамавугольнае палотнішча, якое складаецца з дзвюх гарызантальных палос: верхняй – чырвонага колеру і ніжняй – зялёнага колеру. Адносіны шырыні палос чырвонага і зялёнага колераў – 2:1. Каля дрэўка вертыкальна размешчаны беларускі нацыянальны арнамент чырвонага колеру на белым полі. Дзяржаўны герб уяўляе сабой зялёны контур Беларусі ў залатых промнях сонца над зямным шарам. Зверху контура знаходзіцца чырвоная зорка. Герб абрамляе вянок з залатых каласоў, пераплеценых справа кветкамі клеверу, злева – льну. Гэта сімвалы працы, творчай сувязі з прыродай, а калоссе – сімвал вечнасці жыцця. Калоссе абвіта чырвона-зялёнай лентай, на якой знізу зроблены надпіс золатам: “Рэспубліка Беларусь”.
