Новыя экскурсіі нас чакаюць
Хто падарожнічаў, той згодзіцца з намі: беларусам ёсць чым ганарыцца, ёсць чым пахваліцца. Багата наша зямля на гістарычныя і архітэктурныя помнікі, знаёмства з якімі ўзбагачае чалавека.
Нягледзячы на зімовы халодны дзень, экскурсія ў Мірскі замак ажыццявілася. Аўтобус Петрыкаўскай аўтабазы хутка дамчаў нас да месца. Ступіўшы на мірскую зямлю, мы адчулі подых мінуўшчыны: магутныя сцены, высозныя вежы. А што за імі?
Экскурсавод, цікава апавядаючы пра гісторыю замка і праводзячы нас па залах, дапамог акунуцца ў атмасферу таго часу: стаць удзельнікамі балоў, святочных застолляў, сходаў знаці. Па прыступках крутой лесвіцы падняліся ў вежу. Пад’ём быў цяжкі. А рыцары ж падымаліся па прыступках у даспехах.
Сняжок прыкрыў дзівосы краявідаў замка, але возера без лебедзяў не стала менш прывабным. А легенда, якую расказала экскурсавод пра ўзнікненне яго, дапамагла паверыць у чары і сілу сцюдзёных крыніц.
Накупіўшы сувеніраў з выявамі Мірскага замка, мы, задаволеныя экскурсіяй, вярнуліся дамоў. Сёння ёсць упэўненасць: новыя экскурсіі нас чакаюць.
Улад Агейчык і Таццяна Глушко, вучні 6 класа Бабуніцкай СШ
