У атмасферы цеплыні і ўтульнасці
Школа – частачка жыцця кожнага з нас. Яна фарміруе наш светапогляд, яна дае нам пуцёўку ў жыццё. А мы, пазнаўшы нязведанае і пасталеўшы, прыходзім у родныя сцены, каб зноў вярнуцца ў дзяцінства, у казку, якую дачыталі, але не забылі, бо прыемныя ўспаміны грэюць душу ўсё жыццё.
Траскучы мароз не стаў перашкодаю для ўсіх, хто сабраўся ў Бабуніцкай сярэдняй школе на вечар сустрэчы школьных сяброў. Задорныя вядучыя, словы прывітання дырэктара школы Уладзіміра Герасіменкі, удала падабраныя нумары мастацкай самадзейнасці і шчырыя выступленні выпускнікоў стварылі атмасферу цеплыні і ўтульнасці.
Нам, настаўнікам, прыемна было пабачыць і пачуць ужо не тых нясмелых і няўпэўненых вучняў, а ўжо загартаваных жыццём маладых людзей. З якім жаданнем яны расказвалі пра сваю вучобу, працу! Слухаеш іх і думаеш: дастойную замену падрыхтавалі.
Па-мацярынску павучальна гучалі словы ветэранаў педагагічнай працы Валянціны Бардыгі, Святланы Такун, Валянціны Заброцкай: не забывайце школу, настаўнікаў, якія вас, былых вучняў, рады бачыць. Выпускнікі 2011 года, дзе вы згубіліся?
Валянціна Некрашэвіч, настаўнік беларускай мовы і літаратуры
