У школах і гімназіях краіны праходзіць набор у 1-я класы. Што важна ведаць
З 12 чэрвеня пачаўся прыём дакументаў у 1-я класы ўстаноў агульнай сярэдняй адукацыі
Згодна з Кодэксам Рэспублікі Беларусь аб адукацыі, за кожнай школай замацоўваецца пэўны мікрараён. У 1-я класы перш за ўсё залічваюцца хлопчыкі і дзяўчынкі, якія зарэгістраваны і пражываюць на замацаванай тэрыторыі. Іх бацькі могуць падаць дакументы па 15 жніўня. Калі ж мамы і таты хочуць уладкаваць сына ці дачку ў навучальную ўстанову не па адрасе пражывання, ім неабходна запісацца на асабісты прыём да кіраўніка школы і падаць заяву для прыёму дзіцяці на свабоднае месца. Разгляд такіх дакументаў праводзіцца з 16 па 28 жніўня. Варта ўлічыць, што прымаюць у першакласнікі ў той чарговасці, у якой зарэгістраваны заявы ад жадаючых.
У 1-ы клас школ і гімназій прымаюцца хлопчыкі і дзяўчынкі, якім на пачатак навучальнага года споўнілася 6 гадоў і больш. Разам з тым па заяве бацькоў і пры наяўнасці рашэння педагагічнага савета дапускаецца залічэнне дзіцяці, якому 6 гадоў спаўняецца ў бягучым каляндарным годзе, — гэта значыць тым, каму 6 гадоў споўніцца да 31 снежня 2024 г.
Для прыёму ў 1-ы клас законныя прадстаўнікі павінны падаць наступныя дакументы:
- заяву;
- пасведчанне аб нараджэнні дзіцяці;
- медыцынскую даведку з вынікамі абследавання ўсіх урачоў і з заключэннем аб допуску да навучання.
А таксама прадаставіць пашпарт аднаго з бацькоў з адзнакай аб рэгістрацыі або дакумент, які пацвярджае пражыванне ў мікрараёне канкрэтнай школы.
Прысутнасць будучага першакласніка пры падачы дакументаў не абавязковая. У 1-ы клас прымаюць без уступных выпрабаванняў. У кожнай школе і гімназіі створаны камісіі, якія прымаюць дакументы ад бацькоў будучых першакласнікаў, устаноўлены дакладны парадак і графік работы.
1-я класы могуць размяшчацца на базе як школы, так і дашкольных устаноў. У першым выпадку ствараюцца ўсе неабходныя ўмовы для арганізацыі адукацыйнага працэсу дзяцей шасцігадовага ўзросту, уключаючы сон, харчаванне, прагулкі і г. д. У другім — адукацыйны працэс у першую палову дня ажыццяўляе настаўнік школы, а астатні час з навучэнцамі працуюць іншыя педагагічныя работнікі.
Для першакласнікаў прадугледжана ашчадная арганізацыя адукацыйнага працэсу: урокі праводзяцца толькі ў першую змену; кожнае дзіця забяспечваецца зручным рабочым месцам за партай або сталом у адпаведнасці з ростам і станам слыху і зроку; падручнікі і дыдактычныя дапаможнікі рэкамендуецца захоўваць у школе, для захоўвання верхняга адзення і зменнага абутку, як правіла, выдзяляецца спецыяльнае памяшканне.
Першакласнікі наведваюць заняткі 5 дзён у тыдзень. На працягу верасня самыя юныя вучні вывучаюць курс «Уводзіны ў школьнае жыццё» . У першы месяц навучальнага года ў іх няма заняткаў па матэматыцы, чытанні, пісьму. Гэты час настаўнік прысвячае мэтавым прагулкам і экскурсіям, праводзіць урокі фізкультуры і развіццёвыя гульні, знаёміць з правіламі паводзін у калектыве. Педагог вывучае, наколькі кожнае дзіця гатовае да навучання, дапамагае першакласнікам засвоіць правілы паводзін на ўроках, вучыць арганізоўваць вучэбную дзейнасць і разумець сутнасць пытанняў, з якімі звяртаецца да іх настаўнік.
Пачынаючы з кастрычніка ў раскладзе з’яўляюцца ўрокі па прадметах вучэбнага плана. Урокі ў першакласнікаў доўжацца 35 мінут, але абавязкова з дзвюма фізкультхвілінкамі — па 1,5—2 мінуты кожная. Дамашняе заданне не задаецца. Работа не ацэньваецца адзнакамі. Дапускаецца толькі слоўная ацэнка — «добра», «малайчына», «пастарайся лепш» і г. д. Дарэчы, у сярэдзіне трэцяй чвэрці арганізуюцца дадатковыя канікулы на працягу аднаго тыдня.
Залічэнне вучняў у 1-я класы ажыццяўляецца да 31 жніўня. Падрабязную інфармацыю аб мікрараёне, які адносіцца да школы, парадку прыёму дакументаў, у тым ліку на свабодныя месцы, можна знайсці на афіцыйных сайтах устаноў адукацыі.
