Клопаты дня
Раніца 3 кастрычніка. 8 гадзін 50 хвілін… Ва ўрачыстай абстаноўцы Уладзімір Мікалаевіч Герасіменка перадае штурвал карабля “Школа” свайму дублёру Аляксею Бердніку, які дае старт дню самакіравання.
Па ініцыятыве педагога-арганізатара Ніны Сямёнаўны Кот такое мерапрыемства стала традыцыяй Бабуніцкай сярэдняй школы.
Усхваляваныя вучні-настаўнікі прыступілі да выканання сваіх абавязкаў: праводзілі ўрокі і мерапрыемствы, дзяжурылі па школе і ў сталовай. Бібліятэкар Аляксей Власкін выдаваў неабходныя кнігі, загадчык гаспадаркі Віктар Пінчук сачыў за парадкам і чысцінёй на ўсёй тэрыторыі школы.
Падвядзеннем вынікаў стаў “жывы мікрафон.” Дублёры і настаўнікі дзяліліся ўражаннямі. Вучні прызналіся: ганарова быць настаўнікам, але цяжка. А школьнікі пачатковых класаў называлі ўрокі, якія спадабаліся. Сумнявацца не трэба: фізкультура перамагла.
Самым цікавым момантам дня стаў валейбольны матч паміж настаўнікамі і выпускнікамі. Ва ўпартай барацьбе з нязначнай розніцай перамаглі педагогі.
Вячэрняя віншавальная праграма стала гімнам Настаўніку.
Павел Герасіменка, вучань 10 класа, дублёр намесніка дырэктара па ВР
