Святая зямля Турава
Прыярытэтным накірункам Года гасціннасці з’яўляецца наведванне знакамітых мясцін Беларусі з мэтаю вывучэння гісторыі роднага краю. Аддзел адукацыі, спорту і турызму Петрыкаўскага райвыканкама прадставілі нам, вучням Бабуніцкай сярэдняй школы, якія праявілі сябе ў грамадскім жыцці, магчымасць дакрануцца да старонак сівой мінуўшчыны. Мы наведалі Тураў – сталіцу аднаго з першых беларускіх княстваў.
Колькі цікавага захоўвае тураўская зямля! Краязнаўчы музей – сапраўдная скарбонка гісторыі, якая дапамагае трапіць у далёкае мінулае. Замкавая гара – калыска сярэднявечнага Турава. Сапраўдны цуд – каменныя крыжы, якія растуць з зямлі. Нас зацікавілі легенды іх з’яўлення і вера ў цяпло, якое зыходзіць ад іх. У Спаса-Успенскай царкве даведаліся пра знаходкі ікон і жыццё святых. Гордасцю гарадскога пасёлка лічацца князь Тур і Кірыла Тураўскі, ля помнікаў якім мы сфатаграфаваліся на памяць.
А цяпер скажыце: “Ці ж не чуда ты, тураўская святая зямля!”
Вольга Дубік, вучаніца 10 класа
