"Міс Восень - 2014"
Гімнам творчасці, фантазіі, самасцвярджэнню і самавыражэнню стала конкурсная праграма "Міс Восень - 2014," якая праводзілася з удзелам вучаніц 5-11 класаў.
У сёлетняга конкурсу свая адметнасць. Сярод дзевяці прэтэндэнтак на тытул "Міс" была вучаніца Рассветаўскай школы Акцябрскага раёна Наталля Баравая, якая разам з вучнямі і настаўнікамі гэтай навучальнай установы сталі гасцямі нашай школы.
Праграма конкурсу складалася з пяці этапаў: "Самапрадстаўленне", "Інтэлектуальны", "Абарона касцюма на асеннюю тэму", "Кулінарны", "Творчы."
Конкурс стаў сапраўдным сузор'ем талентаў. Юлія Слесарава, Алеся Юркавец і Наталля Баравая парадавалі прысутных песнямі. У вальсе са сваім партнёрам кружылася Надзея Паўтаран. Упрыгожаннем праграмы стаў усходні танец у выкананні Яны Макарэвіч. Дзіяна Сокал і Таццяна Пінчук прадэманстравалі цырульніцкія здольнасці. На цымбалах беларускую мелодыю выканала Юлія Крук. У ролі завадной Сярдзючкі выступілі Юлія Кот са сваімі сябрамі.
Асенняя калекцыя мод сваёй арыгінальнасцю і вытанчанасцю нічым не саступіць вядомаму Юдашкіну.
У смачным "Кулінарным" конкурсе стравы былі на любы густ.
Святочна аформленая зала спрыяла атмасферы ўтульнасці. Прамежкі паміж этапамі запаўнялі нумары ў выкананні бабуніцкіх і рассветаўскіх вучняў.
Конкурс праведзен, балы выстаўлены. Журы называе пераможцу. Тытул "Міс Восень - 2014" атрымала Юлія Кот. Віншуем пераможцу.
