Рэспубліканская добраахвотная акцыя «Чысты лес»
9 кастрычніка 2021 года ў нашай краіне па ініцыятыве Міністэрства лясной гаспадаркі Рэспублікі Беларусь пройдзе рэспубліканская добраахвотная акцыя «Чысты лес». Кампанія па навядзенні парадку ў лясным фондзе прымеркавана да Года народнага адзінства і нацэлена на выхаванне ў грамадзян беражлівага стаўлення да лесу.
Акцыя «Чысты лес» у Беларусі стала ўжо традыцыйнай. Упершыню яна была праведзена ў 2010 годзе, і за гэты час яе ўдзельнікамі сталі дзясяткі тысяч добраахвотнікаў. Мерапрыемства актыўна падтрымліваецца мясцовымі выканаўчымі органамі ўлады, дзяржаўнымі, грамадскімі і камерцыйнымі арганізацыямі, школамі, вышэйшымі навучальнымі ўстановамі і іншымі арганізацыямі рэспублікі.
Штогод арганізацыі Мінлясгаса накіроўваюць значныя сілы і сродкі на работы па навядзенні парадку ў лясным фондзе. Разам з тым, праблема несанкцыянаваных звалак будаўнічых і бытавых адходаў, іншых старонніх прадметаў у лясах, якія прымыкаюць да аўтамабільных дарог і чыгунак, знаходзяцца вакол населеных пунктаў, садаводчых таварыстваў і дачных кааператываў, на пляцоўках адпачынку і аўтастаянках, па-ранейшаму застаецца актуальнай.
У сувязі з гэтым Міністэрства лясной гаспадаркі заклікае ўсіх неабыякавых жыхароў краіны прыняць удзел у навядзенні парадку: добраўпарадкаваць лясны фонд, прылеглую да сваіх населеных пунктах тэрыторыю. Стаць удзельнікам акцыі можа кожны жадаючы. Для гэтага дастаткова звярнуцца ў любое лясніцтва і заявіць пра сваё жаданне дапамагчы ў навядзенні парадку ў лесе. Арганізацыі Міністэрства лясной гаспадаркі забяспечаць усіх удзельнікаў мерапрыемства неабходным інвентаром.
Даведка: У 2020 годзе ў акцыі «Чысты лес» прынялі ўдзел амаль 39 тыс. чалавек. Толькі за суткі валанцёры разам з работнікамі лясной гаспадаркі прыбралі каля 4,5 тыс. кубаметраў смецця і захламленасці, навялі парадак уздоўж прыдарожных палос, добраўпарадкавалі месцы паблізу мемарыяльных комплексаў і памятных знакаў. Дадаткова было высаджана больш за 1,3 млн дрэў.
