"Школьная планета сустрэла сваіх выпускнікоў"
Школа - гэта дзіўны дом, дзе мы праводзім добрую частку свайго жыцця. Школа - гэта бесклапотнае дзяцінства і сур'ёзнае сталенне, гэта юнацтва і рамантыка, мары і рэальнасць. Толькі школьнае жыццё не можа быць бясконцым. І мы пакідаем школу, каб зноў і зноў у яе вяртацца. Толькі вяртацца ўжо ў статусе выпускнікоў. А выпускнікі - гордасць любой установы адукацыі.
Суботнім лютаўскім вечарам "Школьная планета" нашага храма ведаў сустрэла сваіх выпускнікоў, пасталелых, сур'ёзных і ўпэўненых у сабе. Яны расказалі пра свае будні, падзяліліся ўражаннямі аб школьным жыцці, паўдзельнічалі ў конкурсах, сказалі словы падзякі сваім настаўнікам, а Марыя Васілец, выпускніца 2007 года, выканала для іх песню.
На імправізаванай "Школьнай планеце" ад цяпла дзіцячых і настаўніцкіх сардэц загарэлася 9 сімвалічных свечак: Памяці, Дзяцінства, Мудрасці, Сяброўства, Гумару, Юнацтва, Надзеі, Любові і Веры. Няхай гэтыя свечкі гараць яркім полымем, а "планета" круціцца і круціцца, даючы пуцёўку ў жыццё новым яе выпускнікам.
