Сустрэча школьных сяброў
Гэтым суботнім вечарам настрой у вучняў быў прыўзняты.
Школа сустракала былых выпускнікоў!
У госці да нас завіталі выпускнікі розных гадоў. Мы задаволены, што яе не забываюць тыя, хто закончыў школу год, два, тры, чатыры, пяць гадоў назад і тыя, у каго за спіной вялікі жыццёвы шлях.
Шмат цёплых слоў мы пачулі ад былых выпускнікоў пра настаўнікаў. Кожны з іх выказаў думку, што без ведаў, якія яны атрымалі ў школе, нельга падняцца на больш высокую прыступку жыцця. Былыя вучні, цяпер студэнты, расказалі аб умовах паступлення ў навучальныя установы і сваіх поспехах.
Словы падзякі ад выпускнікоў гучалі і ў адрас ветэранаў педагагічнай працы.
Вельмі прыемна для нас было і тое, што да нас ў гэты вечар завітала наша былая вучаніца, бронзавы прызер летніх Алімпійскіх гульняў у Лондане Літвінчук (Паўтаран) Марына Віктараўна.
Прыгожая, сціплая дзяўчына, расказала прысутным аб сваім спартыўным жыцці, аб сваіх дасягненнях.
Марына дасягнула вялікіх вяршынь у спорце, але засталася простай і добразычлівай дзяўчынай.
У знак удзячнасці за школьныя гады яна падаравала на памяць школе свае фотаздымкі, а вучням аўтографы. Усе прысутныя пажадалі ёй поспехаў і надалей.
Для ўсіх выпускнікоў гучалі песні, выконваліся танцавальныя кампазіцыі.
Дзякуй выпускнікі, што не забываеце школу!
